Boltiqboʻyi federal universiteti (Kaliningrad, Rossiya) akademik mobillik dasturi doirasida Samarqand davlat tibbiyot universiteti ijtimoiy va gumanitar fanlar kafedrasi mudiri PhD Aziza Maxmudova tomonidan Oliy tibbiyot maktabi talabalari uchun maʼruzalar oʻtkazildi.

  Maʼruzalar oʻrta asrning buyuk olimi Abu Ali Ibn Sinoning hayoti va faoliyati, uning sogʻlom turmush tarzi haqidagi konsepsiyasi, shuningdek, “Shifokor va bemorlarning huquq va majburiyatlarini taʼminlash konsepsiyasi asoslari”ga bagʻishlandi. Oxirgi maʼruza doirasida Oliy tibbiyot maktabi talabalari bilan ochiq muloqot oʻtkazilib, bemor va davolovchi shifokor oʻrtasidagi kelishmovchiliklarni qonuniy hal etish, bemorlar va shifokorlar huquqlarining buzilishi holatlari muhokama qilindi.

  Eslatib oʻtamiz, Samarqand davlat tibbiyot universiteti bilan hamkorlik 2022-yil mart oyida boshlangan. 2022-yil oktabr oyida esa SamDTU va I.Kant nom. BFU oʻrtasida tibbiyot sohasida sunʼiy intellektdan foydalanishni birgalikda rivojlantirish va yuqumli jigar kasalliklari uchun shaxsiylashtirilgan tibbiy texnologiyalardan foydalanish sohasida ilmiy hamkorlik toʻgʻrisida kelishuvlar imzolangan.

SamDTU matbuot xizmati