Epidemiologiya kafedrasida talaba-yoshlar bilan ishlash, ma’naviy va ma’rifiy faoliyatni rivojlantirish hamda ularni komil insonlar qilib tarbiyalashga alohida e’tibor qaratiladi. Kafedra faoliyatining asosiy maqsadi – talabalarda milliy istiqlol g‘oyalariga sadoqat, Vatanga muhabbat, fidoyilik va mas’uliyat tuyg‘ularini shakllantirish, ularning barkamol shaxs sifatida voyaga yetishiga ko‘maklashishdir.
Shu yo‘nalishda universitet miqyosida muntazam ravishda turli ma’naviy-ma’rifiy tadbirlar tashkil etiladi. Ularning barchasi yoshlarning dunyoqarashini kengaytirishga, mustaqil fikrlash qobiliyatini rivojlantirishga va milliy hamda umuminsoniy qadriyatlarga hurmat ruhida tarbiyalashga xizmat qiladi. Kafedra o‘qituvchilari nafaqat dars jarayonida, balki talabalar turar joylarida ham ma’naviy-ma’rifiy ishlarning samarali tashkil etilishida faol ishtirok etishadi.
Mazkur faoliyatning samaradorligi universitetdagi jamoat tashkilotlari bilan hamkorlikda yanada yuksalmoqda. Jumladan, Yoshlar bilan ishlash, ma’naviyat va ma’rifat bo‘limi, Kasaba uyushmasi qo‘mitasi, Yoshlar ittifoqi boshlang‘ich tashkiloti va Xotin-qizlar qo‘mitasi bilan hamkorlik asosida keng ko‘lamli loyihalar amalga oshirilmoqda. Bu hamkorliklar tufayli talabalarning ijtimoiy faolligi oshmoqda, ular tashabbuskor va mas’uliyatli fuqaro sifatida shakllanmoqda.
Kafedraning tarbiyaviy faoliyatida asosiy vazifalar sifatida quyidagilar belgilangan: talabalarda fuqarolik burchiga sadoqat va Vatanga xizmat qilish ruhini shakllantirish, kasb-hunarni mukammal egallashga bo‘lgan intilish va mas’uliyatni oshirish, shaxsiy fazilatlarni rivojlantirish hamda ijtimoiy-siyosiy ongni kengaytirish. Shuningdek, talabalarda tanqidiy va tahliliy fikrlash ko‘nikmalarini rivojlantirish, adolatsizlik, ta’magirlik va mahalliychilik kabi salbiy illatlarga qarshi immunitet hosil qilish muhim yo‘nalishlardan hisoblanadi.
Talabalarning bo‘sh vaqtlarini mazmunli tashkil etish ham kafedraning diqqat markazida turadi. Shu maqsadda ilmiy, ijodiy va badiiy to‘garaklar, klub va yig‘inlar muntazam faoliyat yuritadi. Bular yoshlarning qiziqishlarini ro‘yobga chiqarishga, iqtidorini yuzaga keltirishga xizmat qiladi. Shuningdek, sport musobaqalari, madaniy-ma’rifiy uchrashuvlar, bayram tadbirlari va kitobxonlik kechalari yoshlarning sog‘lom turmush tarzini shakllantirish va bilim doirasini kengaytirishda muhim ahamiyat kasb etadi.
Kafedrada ma’naviy-ma’rifiy ishlar doimiy ravishda tasdiqlangan reja asosida olib boriladi. Ushbu jarayonni tajribali pedagoglar muvofiqlashtiradi, jumladan, mas’ul o‘qituvchi Mamatqulov T.T ushbu yo‘nalishdagi ishlarni tashkil etish va nazorat qilish bilan shug‘ullanadi. Bu esa barcha tadbirlarning tizimli va samarali kechishini ta’minlaydi.
Ulashish
