Davolash fakulteti pediatriya kafedrasining o‘quv va o‘quv-uslubiy faoliyati bo‘lajak shifokorlarni sifatli tayyorlash, ularda klinik fikrlash hamda pediatriya va ambulator-poliklinik pediatriya yo‘nalishlari bo‘yicha amaliy kompetensiyalarni shakllantirishga qaratilgan.

  Kafedrada Davolash fakultetining 3-, 4- va 6-bosqich talabalari «Pediatriya» va «Ambulator-poliklinik pediatriya» fanlari bo‘yicha tasdiqlangan o‘quv dasturlari asosida ta’lim oladilar.

  Ta’lim jarayoni tasdiqlangan me’yoriy va o‘quv-uslubiy hujjatlar, jumladan, Davlat ta’lim standarti, malaka tavsiflari, o‘quv rejalari va ta’limning ishchi dasturlari asosida tashkil etiladi.

  O‘quv jarayoniga zamonaviy ta’lim texnologiyalari faol joriy etilib, ulardan keys-texnologiya, muammoli ta’lim, grafik organayzerlar va simulyatsion ta’lim keng foydalaniladi. Mashg‘ulotlarni o‘tkazishda tasdiqlangan diagnostika standartlari va zamonaviy xalqaro tavsiyalardan foydalanish fundamental bilimlarni dolzarb klinik yondashuvlar bilan uyg‘unlashtirish imkonini beradi.

  Zamonaviy texnik va axborot ta’minoti

  Kafedra zamonaviy ta’lim jarayonini tashkil etish uchun zarur bo‘lgan texnik vositalar bilan ta’minlangan. Telekommunikatsiya tizimi yo‘lga qo‘yilgan bo‘lib, o‘quv videofilmlari, taqdimotlar va multimedia dasturlaridan foydalaniladi. Ma’ruza va amaliy mashg‘ulotlar interaktiv panel yordamida olib borilib, bu ta’lim jarayonining ko‘rgazmaliligi va interaktivligini ta’minlaydi.

  O‘quv-uslubiy va kutubxona ta’minoti

  Kafedraning kutubxona fondida rus, o‘zbek va ingliz tillarida 70 dan ortiq nomdagi o‘quv adabiyotlari mavjud. Elektron kutubxona tarkibiga darsliklar, o‘quv qo‘llanmalari, uslubiy materiallar hamda boshqa ta’lim resurslari kiritilgan bo‘lib, ular talabalarga mustaqil tayyorgarlik ko‘rish va kasbiy bilimlarini kengaytirish imkonini beradi.

  Talabalarning amaliy tayyorgarligi

  Talabalarda amaliy ko‘nikmalarni shakllantirishga alohida e’tibor qaratiladi. Talabalar mashg‘ulotlar mavzusiga muvofiq bemorlarni kuratsiya qiladilar, statsionarning birinchi qavatida joylashgan diagnostika va fizioterapiya bo‘limlarida bemorlarni tekshirish hamda diagnostika qilish jarayonlarida ishtirok etadilar, shuningdek, muolaja xonasida davolash-diagnostika jarayonida qatnashadilar.

  Shunday qilib, kafedraning o‘quv va o‘quv-uslubiy faoliyati zamonaviy ta’lim texnologiyalari, xalqaro klinik tavsiyalar, raqamli ta’lim resurslari va amaliyotga yo‘naltirilgan ta’limni o‘zida mujassamlashtirgan holda, kompetent, zamonaviy klinik bilim va amaliy ko‘nikmalarga ega, kasbiy jihatdan yetuk pediatr shifokorlarni tayyorlashga xizmat qiladi.