Samarqand davlat tibbiyot universitetida yoshlarning ijtimoiy-siyosiy faolligini oshirish hamda tahliliy fikrlash qobiliyatini rivojlantirish maqsadida “Med Talk” intellektual debatlari bo‘lib o‘tdi.

  Tadbir universitetning Iqtidorli talabalarning ilmiy-tadqiqot faoliyatini tashkil etish bo'limi tashabbusi bilan tashkil etildi. Unda talabalardan iborat jami 8 ta jamoa ishtirok etib, bahslar o‘zbek va rus tillarida (har bir yo'nalishda 4 tadan jamoa) olib borildi.

  Debatlar davomida ishtirokchilarga Birlashgan Millatlar Tashkiloti (BMT) kun tartibidan o'rin olgan eng dolzarb ijtimoiy va global masalalar taqdim etildi. Qizg'in munozaralar jarayonida talabalar o‘z pozitsiyalarini aniq fakt va dalillar bilan himoya qilish, tanqidiy fikrlash, jamoaviy ishlash va katta auditoriya oldida erkin muloqot qilish ko‘nikmalarini amalda namoyon etdilar.

  Bunday intellektual tadbirlar bo'lajak tibbiyot xodimlarining nafaqat o'z sohasi, balki xalqaro jarayonlar haqidagi dunyoqarashini kengaytirishga, shuningdek, jamiyatdagi dolzarb masalalar yuzasidan o‘z fikrini erkin va ravon ifoda etish layoqatini shakllantirishga xizmat qiladi.

  Yakunda e'tirof etilganidek, “Med Talk” platformasi talabalar uchun o'zaro bilim va tajriba almashish, yangi g'oyalar bilan o'rtoqlashish hamda mazmunli bahs-munozara olib borish uchun muhim maydon vazifasini o'tab berdi.

SamDTU Matbuot xizmati