Mustaqillik yillarida O‘zbekistonda inson manfaatlarini ta’minlash, aholi salomatligini muhofaza qilish va tibbiy xizmatlar sifatini oshirish davlat siyosatining ustuvor yo‘nalishlaridan biriga aylandi. Bugun mamlakatimiz sog‘liqni saqlash tizimida zamonaviy texnologiyalarni joriy etish, kasalliklarni erta aniqlash, ilg‘or diagnostika va davolash usullaridan foydalanish, tibbiyot muassasalarining moddiy-texnik bazasini mustahkamlash hamda malakali kadrlar tayyorlash borasida keng ko‘lamli ishlar amalga oshirilmoqda.

  Mazkur jarayonlarda Samarqand davlat tibbiyot universiteti ham o‘zining ilmiy, ta’limiy va klinik salohiyati bilan faol ishtirok etmoqda.

  Zamonaviy diagnostika — samarali davolash garovi

  Bugungi tibbiyotda kasalliklarni erta aniqlash va aniq tashxis qo‘yish davolash samaradorligini oshirishning muhim shartidir. Samarqand davlat tibbiyot universitetida professor-o‘qituvchilar ishtirokida klinik diagnostika, biokimyoviy tahlillar va zamonaviy laboratoriya usullariga oid amaliy mashg‘ulotlar hamda mahorat darslari muntazam tashkil etilmoqda.

  Jumladan, qandli diabetni ekspress usulda aniqlash bo‘yicha amaliy ko‘nikmalarni shakllantirish bo‘lajak shifokorlarning zamonaviy diagnostika imkoniyatlaridan samarali foydalanishiga xizmat qilmoqda.

  Bunday yondashuv tibbiy ta’limni nazariy bilimlar bilan cheklab qolmasdan, uni bevosita amaliyot bilan uyg‘unlashtirish imkonini bermoqda.

  Yuqori texnologiyalar amaliy tibbiyotda

  Zamonaviy tibbiyot taraqqiyotining muhim ko‘rsatkichlaridan biri — yuqori texnologik va kam invaziv davolash usullarining keng qo‘llanilishidir.

  Samarqand davlat tibbiyot universiteti klinikalarida, xususan, urologiya yo‘nalishida zamonaviy endourologik texnologiyalar yordamida murakkab jarrohlik amaliyotlari bajarilmoqda. Mazkur usullar bemor uchun jarrohlik jarohatini kamaytirish, tiklanish jarayonini tezlashtirish va shifoxonada qolish muddatini qisqartirish imkonini beradi.

  Oftalmologiya yo‘nalishida ham ilg‘or tajribalarni o‘rganish va amaliyotga joriy etishga e’tibor kuchaymoqda. Samarqandda o‘tkazilgan “Zamonaviy oftalmologiyada innovatsion yondashuvlar” xalqaro ilmiy-amaliy konferensiyasi soha mutaxassislari uchun tajriba almashish va yangi bilimlarni o‘zlashtirishning muhim maydoniga aylandi.

  Ona va bola salomatligi — ustuvor vazifa

  Aholi salomatligini mustahkamlashda ona va bola salomatligini muhofaza qilish alohida ahamiyatga ega.

  2026-yil 21-avgust kuni Samarqand davlat tibbiyot universitetida Samarqand viloyatida ona va bola salomatligini muhofaza qilish, tibbiy xizmat sifatini oshirish, bolalar o‘rtasida kasallanish va nogironlik ko‘rsatkichlarini kamaytirish masalalariga bag‘ishlangan yig‘ilish o‘tkazildi.

  Bunday tadbirlar mavjud muammolarni tahlil qilish, ularning yechimlarini belgilash va tibbiy yordam samaradorligini oshirishga qaratilgan amaliy choralarni kuchaytirishga xizmat qilmoqda.

  Zamonaviy tibbiyotga — zamonaviy kadrlar

  Tibbiyot sohasidagi islohotlarning samarasi ko‘p jihatdan malakali mutaxassislarni tayyorlash tizimiga bog‘liq. Shu bois Samarqand davlat tibbiyot universitetida zamonaviy tibbiyot talablariga javob beradigan, amaliy ko‘nikmalarga ega va innovatsion fikrlaydigan shifokorlarni tayyorlashga alohida e’tibor qaratilmoqda.

  Universitetda bakalavriat va magistratura ta’lim dasturlari zamonaviy kompetensiyalarni shakllantirishga yo‘naltirilmoqda. Barcha ta’lim yo‘nalishlari bo‘yicha o‘quv dasturlari muntazam ravishda takomillashtirilmoqda.

  Xalqaro hamkorlikning rivojlanishi esa talabalar va professor-o‘qituvchilarning ilg‘or xorijiy tajriba bilan tanishishi, zamonaviy bilim va ko‘nikmalarni egallashi uchun yangi imkoniyatlar yaratmoqda.

  Tibbiy ta’limda raqamli imkoniyatlar

  Bugungi kunda raqamli texnologiyalar ta’lim va tibbiyot rivojining ajralmas qismiga aylanmoqda.

  Samarqand davlat tibbiyot universitetida ta’lim jarayonlarini raqamlashtirish va boshqaruv samaradorligini oshirish maqsadida 14 dan ortiq axborot va avtomatlashtirilgan tizim ishlab chiqilib, amaliyotga joriy etilgan. HEMIS, Moodle, elektron kutubxona, masofaviy ta’lim va videokonferensaloqa tizimlaridan foydalanilmoqda.

  Xususan, Moodle elektron ta’lim platformasida 17 954 nafar foydalanuvchi ro‘yxatdan o‘tgan bo‘lib, unda 8,5 terabayt hajmdagi elektron ta’lim resurslari jamlangan. Platformaga ma’ruzalar, amaliy mashg‘ulotlar, videodarslar, testlar va mustaqil ta’lim materiallari joylashtirilgan.

Bu raqamlar tibbiy ta’limda raqamli texnologiyalarning imkoniyatlari tobora kengayib borayotganini ko‘rsatadi.

  Ilmiy bilim va zamonaviy ta’lim muhiti

  Malakali shifokorni tayyorlashda zamonaviy o‘quv va ilmiy adabiyotlarning o‘rni beqiyos.

  Universitet Axborot-resurs markazi fondida 111 583 nomdagi 343 010 nusxa adabiyot mavjud. Ularning tarkibida darsliklar, o‘quv qo‘llanmalar, ilmiy va xorijiy adabiyotlar, shuningdek elektron resurslar mavjud.

  O‘quv auditoriyalari va ma’ruza zallarining interaktiv doskalar, multimedia qurilmalari, yuqori tezlikdagi internet va zamonaviy kompyuter texnikalari bilan jihozlangani ta’lim sifatini oshirishga xizmat qilmoqda.

  Sog‘lom avlod — mamlakat taraqqiyotining muhim omili

  Mustaqillik yillarida sog‘liqni saqlash sohasida amalga oshirilayotgan islohotlarning bosh maqsadi — inson salomatligini asrash, tibbiy xizmatlardan foydalanish imkoniyatlarini kengaytirish va aholining hayot sifatini yaxshilashdan iborat.

  Bu jarayonda Samarqand davlat tibbiyot universitetining ta’lim, ilm-fan va amaliy tibbiyotni birlashtirgan faoliyati alohida ahamiyat kasb etmoqda.

  Bugun bu maskanda zamonaviy diagnostika va davolash usullarini o‘zlashtirayotgan talabalar, ilmiy izlanish olib borayotgan yosh olimlar, tajribali professor-o‘qituvchilar va amaliyotchi shifokorlar bir maqsad — inson salomatligini muhofaza qilish va tibbiyot taraqqiyotiga xizmat qilish yo‘lida faoliyat yuritmoqda.

  Mustaqillikning 35 yilligi arafasida ortga nazar tashlar ekanmiz, sog‘liqni saqlash tizimida erishilgan yutuqlar bilan bir qatorda, zamonaviy tibbiyot oldida turgan yangi vazifalar ham tobora kengayib borayotganini ko‘ramiz.

  Eng muhimi, bugungi imkoniyatlar ertangi kun shifokorining bilim va salohiyatini, zamonaviy klinikalar esa bemorga ko‘rsatiladigan tibbiy yordam sifatini belgilaydi.

  Zero, inson qadri va uning salomatligi — taraqqiyotning eng muhim mezonidir.

  Mustaqilligimizning 35 yilligi muborak bo‘lsin!